Chhiatni chungchang sawiho in Joint Meeting- neih a ni
Chanmari West Aug Ni 17: Ni 13 Aug '08 (Nilai) zan dar 8 pm khan  Chanmari West Primary Schoolah Chhiatni chungchang sawi ho in,  Branch Executive, Section Committee, Sub Committee leh YMA Aw Editorial Board-te Joint meetting neih  a ni. He Meeting hi President Pu R.Lalhmachhuanan a kai hruaia, Pu Lalthuamluaia Vice President chu ‘Mitthi lumen khawhar lenpui chungchanga infuih tharna’ thu sawi turin a sawm a.  Pu Thuamluaia thusawi zawh hian Pu C.Liansanga Executive member CWYMA chu ‘khawhar inriah chungchang’ sawi turin a sawm leh a, a sawizawh hnuah Pu T.Ngurkhuma Ex-President, Executive Member CWYMA chu ‘Thlanlaih chungchang’ sawi turin a sawm leh. Pu T.Ngurkhuma sawi zawh hian Pu C.Lalzarliana Fin Secretary chu ‘Mitthi buhfai khawn’ chungchang sawi turin a sawm leh a, hemi hnu hian member kal ten ‘Chhiatni a tun aia tlawm kan ngaih theih dan tur kawng chi hrang hrang an sawi zui.

 He Joint Meetingah hian hetiang hi Committee peng hrang hrangte kal dan a ni.
Branch Office Bearer - 6 an ni a, an kal kim.
Branch Exe. Member - 29 an ni a, 20 an kal a   9 an kal lo.
‘Ch’ Section  - 31 an ni a, 10 an kal a 21 an kal lo.
‘K’ Section - 31 an ni a, 15 an kal a 16 an kal lo.
‘N’ Section - 31 an ni a, 13 an kal a 18 an kal lo.
‘T’ Section - 31 an ni a,   5 an kal a 26 an kal lo.
‘V’ Section - 31 an ni a,   5 an kal a 26 an kal lo.
Literature Sub-Comitt - 19 an ni a,   4 an kal a 15 an kal lo.
Building Sub-Comtt  - 25 an ni a 14 an kal a   9 an kal lo.
Property Sub-Comtt -   19 an ni a, 4 an kal a  15 an kal lo.
YMA  AW Editorial Bd - 8 an ni a 7 an kal a   1 a kal lo.
Joint Meeting a kal zawng zawng 99 an ni.
 He Joint meeting hian ‘Chhiatni a tlawmngaihna kawnga YMA in hma a laknaah kan tlahniam ta deuh chu Hruaitu ten hma i hruai thar ang u’ tiin thu an pass.

BRANCH YMA NEWS
  YMA memberte YMA-ah Piangthar theuh turin Branch YMA chuan a duh a, Tanpui ngaite tanpui a, lusunte hnem tur a thiltih  hi kan Pathian duh dan a ni tih hre thar theuh turin a chah bawk.

  Ni 13.8.08 zana Joint meetinga kal lo Branch Exe Member te Section Committee member te, Sub-Committee member te chu harsatna lian tham tak an tawk a nih Branch YMA chuan a ring.

   Joint meeting neih nana School hmantirtu Primary School zirtirtute chungah Branch YMA chuan lawmthu a sawi.

   JYMA  Zai pawl ten ngawrh takin hla an zir meka, Conductor, Zai pawl member leh a buaipuitu Literature Sub-committee chungah lawmthu a sawi.

Joint meeting a kal lote hriat atan
 ‘Tlawmngaihna chhawmnun kawngah Chanmari West hi tha hlein vengdangin min hmu a, mahse hniam lam kan pan hret hret a, eng vang nge? tu vang nge ? ni ang.  Tlawmngaihna ken kawh chungchangah hian Section hruaitute, Sub-Comtt hruaitute, Branch hruaitute, YMA memberte hian mawh kan phur lian hle a, tan ila ang u’         - Pu T. Ngurkhuma
 ‘Mitthi lumen/khawhar lenpui naah kal hma zir a ngai, theih tawp chhuaha zai kan tum a ngai, a chhunga thutna a awm chuan thut luh tur a ni. Faina kan ngaipawimawh tur a ni. Khuangpu thiam leh Senior zawkte khuang put tir hian zai a nuam duh, in ken thiam a pawimawh hle.’                     -Pu Thuamluaia
 ‘Mitthi buhfai khawna khawn kim loh neih leh khawn lo bial awm thin hi a tha lo, a khawntute leh Section hruaitu ten tan lak a ngai hle, a khawntu ten an dahin mahni bial zawnah thai (tick) ngei ngei thin tur a ni’                                    -Pu C.Lalzarliana
 ‘Thlan lai aiin thlan siam an tam zawk fo mai hi eng vang nge? Thlan siamte chaweipui hi YMA in a phal lo va, mitthi chhung ten ruai an buatsaih a nih pawhin thlan siam ten ei sak lo thin ila an sim mai ang. Mahni awmna Section a mitthi an awmin Tlangval ten thlan lai tho thin ila a tha hle ang’     - Pu RL.Thanhnuna

YMA chhang pual Recitation
 Ni 2.10.08 hian Vanapa Hall-ah  Rampum huap YMA chhang puala kum 8 -14 inkar tan Recitation intihsiak Central YMA-in a buatsaih dawn.  YMA Chhang, Chanmari West Branch YMA aiawh a tlawmngaia tel thei tur chuan Ni 17.8.08 ral hmain Branch Secretary hnenah inhriattir tur a ni. Recitation intihsiakah hian Pu C.Chhuanvawra hla phuah “Chhanchhuahna’ tih sawi tur a ni.

EDITORIAL
Pawnfen leh lukawlh
 Thian ho an ramvaka, an thian pakhat sakeiin a seh a, Sakeiin a seh pa chu a tang thei phian mai a, Sakeiin put sawn a tumin thingbul tanchhanin a inpawt bet tlat a, Sakei pawhin a duh angin a hnuk mai thei lo va, a thiante hnenah chuan thingbul vuana a tan tlat thu leh tanpui turin a ti a. A thian zinga pakhat chuan chhan a tuma, an zinga upa ber chuan a phal lo va. Thingbula a invawn tan reng chu a tlin ta lo a, Sakei chuan a hnuk sawna. A thlang deuhah a in man tang leh a, a thiante hnenah chuan an chhan ngam loh pawhin chem emaw hriamhrei dang eng emaw tal pe turin a ngen leh a, chu pawh chu an la tihsak thei lo fo a, a tawpah chuan a thiante laka beidawng takin Sakei chu a insehhlum tir ta a. Chu thu chu an khua ten an hriat hnuah chuan an lalnu chuan chung ramvak ho chu Pawnfen a pe a, mipa pawh ni lo pawnfen feng tlak chauhah a ruat a, hetiang hi Mipa tan chuan thil zahthlak tawp a ni.
 Hmeichhia pawh hian an tih tur an tih loh  a, an hmeichhe zahawmna ualau taka an pho lan emaw hnamdang laka an inzawrh emawin khawtlang chuan an sam an meh kawlh sak thin. Hei pawh hi hmeichhe tan chuan mualphona rapthlak ber a ni.
 Chhiattawk an awmin Nula tlangval te tih tur tam tak thil a awma, Tlangval Mitthi in leh thlanlaihna vela kal ngai lo chu Pawnfen fen tir ila, Nula pawh an tih tur ti lo chu an Lu met kawlh ila, hei ai hian tlawmngaihna kawngah hian hma kan sawnin kan that phah a rinawm.
 Hetiang em thleng lo tur hian nula tlangval ten tan kan lak a tul hle a, ‘Tanpui ngai’ tanpui kawngah hian harh thar a ngai. Pathiana Piantharna miin a chan takzet chuan tanpui ngai tanpui kawngah (YMA-ah) a piangthar tel ngei ngei tur a ni a, YMA thiltih ngaipawimawh hauh lo ringtu chu hmangaihna nei lo  ringtu a ni ang a, kan Biblein a hnawl ringtu lem tihna an ni ang.

Sports fans inkahna bawm
 SMS na tur 9436154696
 ‘Mimalin Olympic-ah Gold medal 10 chuang an lak tawh laiin Hamaradesh chuan pakhat chauh, a thiam thiam thlang lova a hausa leh thil ti thei Olympica tel tura thlan an nih thin vanga thil thleng niin a langa, Manipur  infiammi thlan loh pawhin boruak a nei lian, he kalphung hi he Zoramah hian chin ve loh a tha’           -9856567616

ARTICLE
Hmangaihtu lo chan
  - C.Lalzarliana
 Kan bul ah hian nula hmeltha tak mai, nunnem em em mai hi a awm a, a bul han awm chang pawh hian engmah hi huatthu hi a sawi ngai lo. A bula awm hi mi tamtak pawhin nuam an ti thin, a bula han awm tawh hi chuan chhuahsan hi a har em em mai thin, mi hi a hip veng veng ni berin ka hria.
 Tichuan kei pawh chuan thildang ngaihsak lek lo hian a bul a chen a, a duh ang ang tal ka thlang ta. A ni pawh chuan min lo duh ve hle a ni ang, eng dang sawi lo chuan ka bulah a awmve ta chawt a, kan in chul nel chho ta chu a ni ta der mai.
 Nula leh tlangval kan ni bawk a, kan in ngeih in kan hlim dun ta viau renga, a chang phei chuan kan hlim lutuk hi kan bul a mite pawh ka nngaihsak chang thei ta meuh lo a in ta ber mai. Kan in duh na alo sang chho zel a, kan pahnih chauh a awm te pawh hian a nuam thei ang ber zel a awm kan thlang ta. Zing a tang a zan tai rek rek thleng hian kan inkuah heuh heuh hi a ni t thlawt mai.
 Kan inkar boruak te pawh a lo sang chho zel, mahse a tir ang reng kha a nih theih loh chang a lo tam ta mai a, awm dan pawh chu kan thiam lo chho ta telh telh mai, a ni lah chuan keiai chuan midang a lo duh leh ta zel bawk nen, kei lah chu ka taksa a lo chak lo tial tial a, a tawp ah phei chuan tluk leh din ka fawm chho ta. A in lah chu rilru fim takin rilru verther takin ka bulah a lo khawsa thin a lo ni a, a that ngai in a tha chho reng bawk si.
 Tichuan keilah chu chak lohna in min um zui ta reng mai a, ka kawp hlei thei ta lo, ka nunna hial pawhin a lo tlin lo dawn ta maile, kan mut chang te hian nula hmeltha deuh bula awm chho a ti lo chuan ramhuai ni maw; thil thalo  pui pui ka hmu ta, eng ruai ti thei lo chuan a bul ah ka la tal ka la tal ve bawk si. Hrehawm na hlir in min hmuak chho ta, thlah kan tum sa teh nang a, min kuah thuak thuak bawk nen ka nun chuan a tuar ta, ka tlin lo ta, ka thlarau chu chatuan hremna lam tluang ah a liam ta. A va pawi em, a va pawi em.
 ZU ( Nula hmeltha) bawih a awm chu mahni tan a pawi thin.

Ruihhlo do
 Miin khawvel hi a mum a ni an tih chuan a mum a ni e ti ve mai rawh. Thil dik leh tha hi chu a thlawptu nih hi a him ber mai
 Y.M.A ten ruihhlo an dova, a that zia leh mi tam tak ten an hlawk pui a, chhungkaw hlimna a thlen thin. Chutih lai a lo sawiseltu kan la awm fo mai hi a pawi a ni. Y.M.A te hian ruihhlo hi do ta lo se chu kan thalai te hian ILP hi hum hlei thei lovin kan rui buai ang a, hnam dang hian min chimpil mai a hlauhawm, hnam dang ho lah hi an rui buai ngai der mai silo. Mizo ho hi chuan ngaihtuahna pawh hmang hlei thei lovin kan duh tawh vek hi chu kan ei in kan in duak duak mai si; hnamdang te hi chuan fing takin hun lo la thleng tur thlir ranin an in a, keini chuan ngaihtuahna bo thak in kan in mai bawk si, a va pawi thin tak em!! Ruihhlo dotu te hian an duh reng vanga do a, ti ti a ni bik lo; ram leh hnam an hmangaih a, kan tu leh fate an lo him zawk nan an do a ni tih hi i hre thar mawlh ang u.
 Y.M.A tluang takin kal zel rawk se.
(Branch OB atangin Kumpuan bawhzuina Article kan dawng hi a lawmawm hle. OB dang pawhin rawn siak liam liam se, kan chanchinbu a phuisui phah sawt ang. Ed.)

I Ngaih tuah ngai em ?

1.Midangte  zirtir duh leh kaihruai tur chuan mahni hian kan tih phawt a ngai thin
2.Khawhar leh mitthi in a i kal ngai loh chuan i chunga a lo thlen hun ah mi te phut lo ang che.
3.Midangte i hmuh hniam viau chuan nangmah in en let ang che.
4.Ui leh ar i khuahkhirh loh chuan miten thil an tih dik loh pawhin dem lo ang che.
5.I in leh a vel a fai loh chuan hrisel i duh lo tih na a ni.

SECTION REPORT
TAITESENA
£ Dt.12.8.08(Tue) zan khan Section comm't neih a ni a, thu pawimawh tak tak rel a ni.Hetih lai hian harsatna emaw rokhawlhna emaw sawi lova comm't na a kallo hruaitu kan la awm thin hi chin tawh loh a comm’t  ngaih pawimawh thin turin an in ngen.
£ Dt.13.8.08(Wed) zan inkhawm ban khan Br.YMA  in a Sect. hrang hrang, e.t.c. hruaitute meeting neih tur a a ruahman chu tluangtaka neih a ni a, he meeting ah hian Leader leh Secretary te bakah Tv.Rodingliana Tochhawng, Pu H.Lalramhluna, Tv.Johny Lalthanpuia leh Nl.Lalthlamuanpuii te an kal a Pute, Lalramliana leh Lalngaihawma ten phatna thu an rawn sawi bawk. Hruaitu 31 teh meuh kan awm lai a heti zat lek kan kal hi chu kan ngaipawimawh tawk lo hle tih alangin hruaitu kan nihna hetiang hunah hian lantir tawh thin ila a lawmawm hle ang..
£ 'Kawngpui dungah lirthei sil ching kan la awm', tih report a lang fo hi thil zahthlak a ni tih hria in kawngpui bula lirthei nei ten i hre thar leh theuh ang u. A chhiatin a phun peih peih kan ni leh thin si a.
£ An hruaitu Pu C.Zonunsanga leh Pu Lalngaihawma ten Bawlhhlawh paih tawh lo tur a ngenna Signboard a thlawna nalh tak an siamsak chu an chungah lawmthu an sawi takzet.
£ Section chhunga H/No. neilo leh Name plate neilo mamawh leh duh kan awm a nih chuan Section hruaitute hnenah hriattira man tlemte chawia  siamtir theih reng a ni e.

NEUVA
£ Sumtuak nana Lucky Ticket an siam chu Dt.15.8.08(Fri) khan vawr a ni a, hetiang hi result a ni :
1st Prize : Sitai(Sakawrtuichhun) No.1373
2nd Prize : Dr.Zothantluanga (Zarkawt) No.0513.
3rd Prize : Hmingtei (zarkawt) No.0665.Consolation  :1758,1049,1376,1238,1178,1222,1153,
1149,1361 & 0814.
 Lawmmam te hi August thla chhungin Pu Vanlalvuana, Asst.Leader hnenah lam tur a ni.
£ Tlawmngaia ticket leisak tute zawng zawng chungah leh a zawrh hnatlanga thawkchhuak te zawng zawng te leh vengpawn mi tlawmngaia leisaktute zawng zawng chungah lawmthu an sawi.
£ Pu Biaktluanga Hauhnar, Grace Nursing home a awm mek chu a damtaka a lo chhuah thuai an beisei.

VANAPA
£ Tunkar chho hun remchang hmasa ber ah Commitee koh tum a ni a, hruaitute  an in hriattir lawk.
£ An Secy. Tv. Hmingthansanga chgu Police training in Mualpui lamah a awm  mek
£ Section dang atang a an Section a pem lut te vengchhung pem lehkha ngai pawimawh theuh turin an ngen.
£ YMA RUN Sakhna zawhfel hnaih tawh a ni. A sak chhung zawng a tha hnem ngai tak a hnatlang thin te, hnatlang thei lo pha te chung ah lawm thu an sawi.
£ Septic tank pipe zawmna tur Pu R. Lalthlamuana’n a pe chu an lawm tak zet.

KHUANGCHERA
£ An hruaitu pawimawh tak mai Nl.Vanlalruati(Atei), KVK(Agri.) ah officer hna a hmuh lawm nana chawhlui a buatsaih chu Dt.15.8.08 khan Sect. hruaituten puar takin an kilhova. A kawppui awm mi hmuh phah nan a ahman ngei an duhsak.
£ Dt.9.8.08(Sat) khan Sect. hruaituten bungraw enfel hnatlang an nei a. Mi 20 thawkchhuakin kuang 2 kilh pumsa an nei a. Sect. bungrua Dekchi No.12, pakhat leh baltin 3 a awmna chin hriat loh chu pawi an ti takzet a. Aranglama dah kir turin an ngen.
£ Khawtlang thil anih hre reng chunga kir leh turin an chah.
£ Section bungrua te a hmangtuten hman zawh veleh a a awmna hmunah fai taka dah kir leh turin an in chah a, Dimdawi taka enkawl thin turin an in ngen nawn leh.
£ Pem lehkha chungchangah in luah tur nei chhungkua ten YMA duhdan zawm turin an inhriattir in an in ngen nawn leh.

CHAWNGBAWLA
£ Ni.2.9.08 hian sumtuak nana sangha zawrh an tum a, Section chhungtinte tlawmngaia lo leisak theuh turin an ngen.
£ U.D.C. Survey an nei mek a, hruaitute Ni 22.8.08 hma ngeia thehlut hman tura hma la turin an in ngen.
£ YMA Park faitaka enkawl thin a, veng him thin tu Springdale School te chungah Comm’t chuan lawmthu a sawi tak meuh meuh.
£ Ni 20.8.08(Nilaini) zan inkhawm ban ah chhiatni Fund a huhova khawn tur a ni a, hruaitute Pu C.Vanlalhruaia te in ah in nghahkhawm tur a ni e.

ZCC NEWS
£ Ni.2.9.08 hian sumtuak nana sangha zawrh an tum a, Section chhungtinte tlawmngaia lo leisak theuh turin an ngen.
£ U.D.C. Survey an nei mek a, hruaitute Ni 22.8.08 hma ngeia thehlut hman tura hma la turin an in ngen.
£ YMA Park faitaka enkawl thin a, veng him thin tu Springdale School te chungah Comm’t chuan lawmthu a sawi tak meuh meuh.
£ Ni 20.8.08(Nilaini) zan inkhawm ban ah chhiatni Fund a huhova khawn tur a ni a, hruaitute Pu C.Vanlalhruaia te in ah in nghahkhawm tur a ni e.

INFIAMAN (Y-a)
EPL an tan, Chelsea an ring
 English Premier League 2008-09 chu nizan tlai atang khan tan a ni a. Champion lai Manchester United chuan rin la hlawh hle mah se, kum dang angin transfer hunah thawm an nei lo va. Season liam ta league leh Champions League-a United hneh zo lo ve ve Chelsea chuan coach thar Brazilian Luiz Felipe Scolari an neih bakah, player tha an lak luh bawk vangin United thuneihna chhuhsak thei turin an beisei.
 2007 nipui bazar hun chhung khan English Premiership club 20 ten pound maktaduai 450 an hmang a. Kuminah hian 100 vel bawr chiah la hmangin, an inhralh chhuak nasa hle lehnghal. An chhut dan chuan tun tumah hian player lei nana sum an sen zat thuak hralhna atangin an la lut a. A bikin Tottenham, Liverpool leh Arsenal-in lut leh chhuak an nei nasa.
 Chelsea chuan coach thar an neih bakah, Portuguese player pahnihn, defender Jose Bosingwa (pound maktaduai 16.2 man) leh midfielder Deco (pound maktaduai 8 man) an lei a. Real Madrid atangin Robinho an la beisei mek bawk. Player an lak luh mai bakah Scolari-an team chhungah boruak tha tak siamin, dinhmun chiang lo Frank Lampard chu Premier League player zinga hlawh hnem ber nia karkhata pound 150,000 hlawh turin kum 5 daih contract an ziah thartir a. Didier Drogba pawh Stamford Bridge-ah a nghet leh ta bawk nen, chiri viau tura ngaih an nih laiin player tha tute mah an chhuak lo.
 Manchester United chuan Tottenham atangin Dimitar Berbatov an lei ngei dawn niin an tarlang a. Tun thlengin tute mah lei belh erawh an la nei lo a, player langsar lem lo 5 vel erawh an chhuahtir thung. Chutih laiin superstar Cristiano Ronaldo an chelh dawn chiang a, mahse, forward tha pahnih Ronaldo leh Wayne Rooney te chuan mumal takin season an tan hmel lo va. Ronaldo phei chu kar ruk vel tal a awl a la ngai dawn.
 United manager hlui Sunderland boss Roy Keane chuan : "Kumin chu Chelsea kum a ni. Englai pawhin United hi ka rilrua lian ber a ni reng a, mahse, tun tumah chuan Chelsea ka ring tlat," tiin a sawi.
 Premier League chanchin ziaktu langsarte chuan United leh Chelsea an ring nawk hlawm a, chutih laiin, nikum lam aiin Chelsea-ah beiseina an nghat lian a. Scolari-an London club tana season khat a hmannaah Premier League manager hlawhtling ber Sir Alex Ferguson-a title kawl lai a laksak theih mai ringtu an tam zawk mah ?
 Liverpool-in season inbuatsaihnaah thawm nei lian mah se, title la em tur chuan rin an la hlawh zo tawk lo va. 2004 hnua title beisei leh mek Arsenal chuan nikum ang bawkin rin an hlawh lo va, tun aia hniam zawk tura ngaih na a lian zawk mah.
 Tottenham chuan player langsar; Luka Modric, David Bentley leh Heurelho Gomes te an la lut a. English club zinga player lei nana sum seng hnem ber niin pound maktaduai 46.2 an hmang tawh a. Mahse, player 9 an hralh tawhte atangin pound maktaduai 40 bawr an la lut anga chhut a ni. Spaniard manager Juande Ramos-an team a siksawi nasa hle a. Tunah hian forward tha tak lak belh a la tum mek a, Berbatov erawh a hloh ngei dawn niin a lang thung.
 Manchester City boss thar Mark Hugges pawh a che na pawl a ni a. Brazilian striker Jo chu pound maktaduai 19-a leiin, club player man to ber a ni a.  Tal Ben Haim an lak luh bakah, striker tha lei a la tum mek. A club hlui Blackburn striker Roque Santa Cruz lei tuma pound maktaduai 12-a a dawrna erawh an hnawlsak a. Ronaldinho lak luh a tum laiin, Milan a ngam lo.
 Aston Villa chuan player 7 la lutin, Rangers atangin Spanish defender Carlos Cuellar chu pound maktaduai 7.8 in a lei a, tun nipui chhunga an lei to ber a ni a.  Villa, City leh Spurs te chu Arsenal leh Liverpool te nena Big Four dinhmun inchuh phak tura ngaih an ni.
 

CWSC NEWS
u Sumtuak nana Lucky Ticket an siam chu nimin ni 15 tlailam khan vawrh a ni a, heng mite hi lawmman dawngtute an ni.
1st Prize  : LTZI Chanmari 'W'
2nd Prize : LTZ Chanmari 'W,
3rd Prize : H.Lalrinthanga Chanmari  'W'.
 Tlawmngaia ticket leisak tute zawng zawng chungah Football Sub-Committee chuan lawmthu a sawi takzet a ni.
u II Div players te thahnemngai lehzuala practice chhunzawm tur leh tournament lo awm tur a champion ngei tura inbuatsaih turin an in ngen an in  hriattir.
u Chanmari ‘W’ Indoor Stadium a dah tur partition tha tak a thlawna siamsaktu Pu K.Lalthakima (Ramhlun Sofa) ‘CH’ chungah lawmthu an sawi.
u Indoor Stadium ah hetiang ang hian inkhelh dan ruahman a ni a, zinglamah Badminton khelh tur niin, tlai lamah Volleyball khelh tur a ni e.
Infiammi ten i zawm theuh ang u.

YMA ZAIPAWL HUANG
 Zai Pawl member tur atana ruat hmasak zing atangin pha an awm nual avangin Zai pawl member atan heng mite hi ruat belh leh an ni. Hei bak pawh hi ruat belh a la ngai maithei a, zaimite lo in kau turin kan ngen.
Tv. H.Llrinmawia Tv. Lalsawmzuala,
Tv. C.Lalremruata Pu H.Lalramhluna
Tv. Lallungmuana Tv. Zothankima
 Literature Sub-Committee kut-ah Branch YMA Zai pawl hi Branch Committee in a dah a ni tih hre thar leh turin Literature Sub-Committee memberte hriattir nawn leh.
 Hla zirna hmun sawn a ni maitheia, Ni 19.8.08 zan hian hla zir leh tur a ni a, zirna hmun hi Information mike-a in hriattir leh tur a ni ang.
   Hla zirna a kal tlai bengpawta su te:
Pu Zothangzuala Chhangte(Conductor)
Pu R.Lalbiakhluna, Pu.K.Lalremmawia,
Nl.Biakhlimpuii, Nl. Lalchhandami Tochhawng, Tv Lalzabiaka, Nl.Vanlalruati te anni a, Bengpawta an su lai thlalak ti lang lo tura an ngen avangin an hming chauh tih lan a ni. Tv H.Lalchhuanmawia chu ban dawna a kal chauh avangin a su ve hman lo, hla zir leh hunah a single ang.
 Hla zir ngaipawimawha, kim taka kal thin tum nise, thildang pawimawh tlansana, tun thla chhung chauh tal YMA  taka hmala turin Zai pawl memberte ngen an ni.

THU SATEL LU
 YMA member 2000 chuang awmna vengah hian  khawhar inah kal ngai lo eng zat nge awm ang? kal ngai lo zinga tel Nula Tlangval nih hi thil zahthlak tak a ni. Khawhar in-ah hian hming lam tawh thin ila kan kal tha deuh ang.  - Pa Dar
 KTP Beat Contest-ah khan Pu Lalramhluna Hauhnar (Zaitupar) Pu K.Darthantluanga (Zuttupar) Pu C.Chawiliana (Khuangpu) hoin kan tle lo a, tel ila chuan 1na kan ni ang.  - Pu Vuana(Rapper)